Rupa-Rupa Leumpang

* Boyot = Leupang kendor bangun bareurat awak, mindeng katinggaleun batur.

* Deog/pengkor = Leumpang dingdet lantaran suku nu sabeulah rada pondok.

* Dohot-dohot = Leumpang lalunan bari semu dodongkoan cara peta nu ngadodoho.

* Egang/egol = Leumpang cara budak nu anyar disunatan lantaran bisul dina palangkakan, jste.

* Gonjleng = Leumpang awewe bari ngobah-ngobahkeun awak, hayang narik parhatian lalaki.

* Ingkud-ingkudan/jingkrung = Leumpang teu bener lantaran nyeuri suku, jste.

* Jarigjeg/jumarigijeug = Leumpang bari semu rek labuh (biasana jalma nu geus kurang tanaga atawa nu kakara gudang geuring).

* Jingjet = Leumpang bari semu hese ngalengkah lantaran cacad suku atawa make samping nu heureut teuing.

* Kepoh = Leumpang teu bener lantaran tuur rada paadu (meh kawas aksara X).

* Kukurubutan = Leumpang rada dodongkoan di nu bala atawa dinu remet kakayon.

* Moyongkod/mongkoy = Leumpang anca rada dongko, nembongkeun ulat sieun atawa era.

* Narabas = Leumpang dinu bala atawa dinu remet kalawan teu miduli cucuk, jsb.

* Neker = Leumpang ditempat nu nanjak pisan (netek).

* Nelenden = Leumpang budak, anca, pikalucueun.

* Nelenyeng = Leumpang nu asalna anca ujug-ujug gancang.

* Niliktik = Leumpang budak nu kakara bisa leumpang gancang, titiliktikan ka ditu ka dieu.

* Nolog = Leumpang talag-tolog (lanataran teu awas) dinu poek.

* Noyod = Leumpang nurutkeun karep sorangan, teu malire kanu nyaram.

* Ngabadaus = Leumpang (semu gancang) teu luak-lieuk.

* Ngabengbeos/mengpeos = Leumpang teu luak-lieuk (biasana lantaran aya kakeuheul, kateusugema, jste.).

* Ngabalideug/dalugdag-daligdeug = Jarugjag-jarigjeg, leumpang kawas nu mabok, kawas nu rek titolojong.

* Ngadedog = (Awewe) nu leumpang anca sarta biritna ka kenca ka katuhu.

* Ngadigdig = Leumpang gancang sarta segut.

* Ngadingleu = Leumpang kendor, semu bareurat ngalengkah.

* Ngadudud = Leumpang gancang teu luak-lieuk.

* Ngagandeuang = Leumpang lalse, dada ajeg, bari keupat laun.

* Ngageang = Leumpang semu egang.

* Ngageblay = Leumpang awewe, anca, bari keupat laun, geblay-geblay.

* Ngageblig = Leumpang bari neundeut-neundeutkeun suku nepi ka kadenge sora blig, blig, blig (sabalikna tina keketeyepan).

* Ngageboy = Leumpang awewe nu rada lintuh, awakna semu leuleus.

* Ngagegag = Leumpang kendor semu bareurat awak.

* Ngageyot/ngagiyet = Leumpang awewe bari semu ngobah-ngobahkeun bujur.

* Ngageuyenggeung = Leumpang laun nu keur geuring atawa nu kakara hudang geuring.

* Ngagidig/ngagedig = Leumpang gancang sarta segut (Sarua jeung ngadigdig).

* Ngagigeug = Leumpang semu beurat ku awak, oyag ka kenca ka katuhu.

* Ngagilincing = Sesebutan keur nu leumpang teu mawa nanaon.

* Ngagiplek = Leumpang awewe nu gendut, bujurna guplak-giplrk.

* Ngagitek = Leumpang awewe bari semu ngagutak-gitek bujur.

* Ngalanggeor = Leumpang awewe (biasana nu lenggik) nu alus katempona.

* Ngalejeg/lajag-lejeg = Leuleumpangan dihareupeun batur bari ambek.

* Ngalenghoy = Leumpang alon lantaran cape.

* Ngaleyad = Leumpang anca diaplen.

* Ngeteyep = Leumpang laun (biasana nu keur ngintip) sieun kadenge atawa katempo ku batur.

* Ngincid = Leumpang gancang (sorangan).

* Ngingkig = Leumpang gancang teu luak-lieuk.

* Ngiciprit = Leumpang keur waktu hujan atawa keur loba keneh cileuncang.

* Nyelengceng = Leumpang gancang sosoranganan (miheulaan batur).

* Ngungkug = Leumpang gancang teu luak-lieuk.

* Nyerenteng/nyirinting = Leumpang semu lumpat nyampeurkeun batur (bari ambek).

* Rarampeolan = Leumpang semu leuleus (nu keur mabok, jste.).

* Rincug = Leumpang teu bener lantaran nyeuri dampal suku, atawa leumpang di nu bala sieun kacugak lantaran teu make sendal/sapatu.

* Sasampoyongan = Leumpang gagaleongan (nu keur mabok, jste.).

* Seseleket = Leumpang diantara jelema loba.

* Seselendep = Sarua jeung seseleket.

* Singkang = Leumpang semu jegar lantaran sukuna (ti lebah tuur ka handap) semu kaluar, sabalikna tina kepoh.

* Tonggoy = Leumpang teu luak lieuk (bari tungkul), teu mirosea ka nu ngageroan.

* Totolonjongan = Leumpang kawas nu rek tijongjolong.

* Turugtug, nurugtug = Leumpang gancang di nu mudun.

* Tuturubun = Turun (leumpang) rurusuhan, buru-buru.

Nuduhkeun Nu Leumpangna Lobaan :

* Ngabring = Leumpang babarengan (lobaan).

* Ngabrul = Kaluar atawa indit babarengan.

* Ngaburudul = Kaluar ti hiji tempat (lobaan).

* Ngaleut = Leumpang babarengan (jalmana leuwih loba tibatan ngabring).

* Ngantay = Sarua jeuung ngaleut.

* Ngeungkeuy = Saharti jeung ngaleut; ngaleut ngeungkeuy ngabandaleut, ngembat-ngembat nyatang pinang (paribasa).

Mung sakitu nu kahaturanan, upami baraya ngagaduhan nu sanesna atanapi anu hilap ku panulis kahaturkeun mangga kantun di dugikeun dina koropak komentar dihandap ieu, haturnuhun.

Copyright © Tatar Pasundan