* Andegleng = Diuk ajeg tumaninah dina korsi.
* Andeprok = Emok rekep (awewe).
* Anjeucleu = Diuk ngeunah-ngeunah di tempat nu rada luhur (dina tonggong munding, kuda, jste.).
* Campego = Cingogo kawas aya nu di dagoan.
* Candeluk = Diuk sabarahana lilana kawas aya nu didagoan.
* Cangogo/cingogo = Nagog, peta saperti nu keur bubuang.
* Emok = Diuk awewe, sukuna duanana ditikelkeun semu ka gigir ditindihan ku dua pingping.
* Emok cabok = Emok nu pingpingna dipatumpangkeun.
* Nagog = Cingogo.
* Naggeuy gado = Diuk biasa ngan leungeun nu sabeulah dipake naggeuy gado; diuk nanggeuy gado biasa keur ngalamun atawa baringung pipikiran.
* Ngabaheuhay = Diuk nyanghunjar bari suku direnggangkeun, biasana lantaran cape.
* Ngebebengkong = Diuk lila bari semu bengkung, bari nganggur.
* Ngalageday/ngalegeday = Diuk nyangsaya (biasa dina korsi males, jste.).
* Nyanghunjar = Diuk bari ngalonjorkeun suku sabeulah.
* Nyanghunjar lembar = Diuk bari ngalonjorkeun suku duanana.
* Nyangsaya = Diuk bari nyarandekeun awak kana tempat nu disarandean.
* Sidengdang = Diuk bari suku duanana dirumbaykeun (biasa diuk di imah panggung nu aya kolongan); lamun sukuna duanana diayun-ayun, disebutna ucang-ucangan; lamun suku nu diayun-ayunna bari di diukan budak, disebutna ucangangge (sarupa kaulinan).
* Sideuha = Diuk emok atawa sila bari leungeun sabeulah dipake nulak awak.
* Sila = Diuk bari nikelkeun suku duanana handapeun pingping nu didengkakkeun.
* Sila andekak = Sila semu rubak, biasana bari nyanghareupan kadaharan.
* Sila ipis = Sila rubak, tuur anggang pisan nepi ka jebrag.
* Sila mando = Sila bari leungeun duanana aya diantara dua suku nu ditumpangkeun, awak biasana semu doyong ka hareup.
* Sila tumpang = Sila bari dampal suku duanana numpang dina pingping kenca katuhu.
* Sila tutug = Suku nu sabeulah sila, sedeng nu sabeulah deui ditutugkeun.
Copyright © Tatar Pasundan
Posting Komentar