K
- Ka cai diangir mandi, batu lempar panuusan = Lemah cai, bali geusan ngajadi.
- Ka cai jadi saleuwi, ka darat jadi salebak (salogak) = Layeut, runtut-raut, silih ayunkeun (nu laki-rabi atawa nu sosobatan).
- Ka hareup ngala sajeujeuh, ka tukang ngala sajeungkal = Hirup ati-ati make itungan.
- Ka luhur sieun gugur, ka handap sieun cacing = Taya kawani.
- Ka luhur teu sirungan, ka handap teu akaran = Taya kamajuan minangka hukumullah ka jelema doraka atawa nu sok jail ka batur.
- Kabawa ku sakaba-kaba = Kabawakeun atawa kapangaruhan ku batur nu teu pati eucreug.
- Kabedil langit (kabentar mega) = Kalinglap.
- Kabeureuyan mah tara ku tulang munding, tapi ku cucuk peda = Cilaka mah biasana tina mokahaan urusan leutik.
- Kacang poho ka lanjaran = Poho ka asal wiwitan, pindah pileumpangan.
- Kacanir bangban = Kawiwirangan, meunang kaera.
- Kacekel bagal buntutna = Katewak luluguna.
- Kaceluk ka awun-awun, kawentar ka janapria = Kamashur, sarerea pada nyaho.
- Kaciwit kulit kabawa daging = Kabawa goreng ku kalakuan baraya anu salah, atawa milu ngarasa teu ngeunah lantaran aya baraya dihina ku batur.
- Kaduhung tara ti heula = Ngarasa hanjakal mah geus tangtu moal samemeh migawe kasalahan.
- Kagok asor (asong) = Jangji nu geus kapalang disanggupan, nepi ka kapaksa kudu dilaksanakeun.
- Kahieuman bangkong = Siga beunghar lantaran katitipan banda batur.
- Kai teu kalis ku angin = Jelema mah tara senang salalawasna, hiji waktu pasti pinanggih jeung kasusah.
- Kajejek ku hakan = Hasil usaha beak ku kaperluan dahareun wungkul.
- Kajeun kendor, dapon (asal) ngagembol = Kajeun lila asal hasil (hade).
- Kajeun pait heula amis tungtung, manan amis heula pait tungtung = Leuwih hade bejaan heula nu banggana, ti batan dibibitaan heula ku untungna, bisi ahirna kaduhung.
- Kajeun panas tonggong, batan tiis beuteung = Kajeun teuing cape digawe oge, asal bisa dahar kalawan cukup, teu kakurangan.
- Kakeueum ku cai toge = Eleh pisan ku pamajikan, nepi ka dipangnyelewerkeun oge cicing bae.
- Kalah ka ingkig = Usaha ka ditu ka dieu teu hasil.
- Kalah ka ngahuntu = Ngan bisa nyarita atawa pidato wungkul.
- Kalapa bijil ti cungap = Muka rusiah sorangan kalawan teu dihaja.
- Kaliung kasiput = Loba baraya nu baleunghar, sasat kalingkung.
- Kandel kulit beungeut = Teu boga kaera, sabalikna tina ipis kulit beungeut
- Kapiheulaan ngaluluh taneuh = Hudang kabeurangan.
- Kapipit galih, kadudut kalbu = Kapincut, bogoh.
- Kapiring leutik = Kaisinan.
- Karawu kapangku = Sagala pagawean kacabak, tur hasilna hade; kalakon kumaha pait peuheurna, muga-muga turunan urang mah kari ngeunahna.
- Kasangga (kasuhun) kalingga murda, katampi ku asta kalih = Katarimakeun, sarta dinuhunkeun pisan.
- Kasep ngalenggereng koneng = Nya kasep nya ginding.
- Katempuhan buntut maung = Ngagantian kasusah batur.
- Kakeureut ku sieup, katindih ku kari-kari = Kasangka boga dosa.
- Katuliskeun jurig = Asal heureuy jadi enyaan.
- Katurug katutuh = Keur cilaka katambah-tambah ku pikasusaheun.
- Kaum marhaen = Somah, rayat biasa.
- Kawas aul = Sok ciciduh.
- Kawas aeud = Nya goreng budi nya bangor.
- Kawas anjing kadempet lincar = 1. Nu leutik dikaniaya ku dununganana, ari rek ngalawan teu bisa, ngan bati humandeuar bae; 2. Keukeuleuweuhan teu puguh.
- Kawas anjing parebut tulang = Parasea marebutkeun barang anu teu pira.
- Kawas anjing tutung buntut = Berebet ka ditu berebet ka dieu, kawas nu samar polah; ijigimbrang teu daek cicing.
- Kawas anu teu dibedong = Kaluar-asup tara nutupkeun panto.
- Kawas awi sumaer di pasir = Luak-leok pikir teu pag'euh tangtungan.
- Kawas badak Cihea = Jelema nu leumpangna noyod siga nu degig.
- Kawas bangkong (bancet) katuruban batok = Jelema anu taya kanyaho lantaran sapopoena ukur idek liher di lemburna.
- Kawas bayah kuda = Belel pisan, upamana samping.
- Kawas beubeulahan terong = Sarua pisan rupana, nu kembar.
- Kawas beusi atah beuleum = Geuneuk rupana bakat ku kacida ambekna.
- Kawas birit seeng = Hideung lestreng (kulit jelema).
- Kawas bodor reog = Jelema nu tingkah polahna pikaseurieun.
- Kawas bueuk beunang (meunang) mabuk = Ngeluk jeung teu wani ngomong, lantaran rumasa boga dosa.
- Kawas bujur aseupan = Diuk teu daek cicing.
- Kawas (cara) cai dina daun bolang (taleus) = Nasehat atawa papatah taya nyangsangna, taya nu terap.
- Kawas carangka runtah = Jelema nu sagala beuki jeung gembul.
- Kawas careuh bulan = Diwedak kandel teuing.
- Kawas ciduh jeung reuhak = Sarua gorengna (goreng adat).
- Kawas congcorang murus = Jelema (budak) anu jangkung tapi kacida begangna.
- Kawas cucurut kaibunan = Goreng patut, sarta pikarunyaeun.
- Kawas dodol bulukan = Beungeut hideung diwedakan teu rata.
- Kawas dongeng Si Bosetek = Gunta-ganti aturan, tapi tetep taya kamajuan.
- Kawas durukan huut = Pibahayaeun nu teu kaciri, tapi beuki lila beuki gede.
- Kawas gaang katincak = Jelema (biasana barudak) nu keur garandeng, ngadadak jempe sapada harita, lantaran reuwas atawa aya nu dipikasieun ku maranehna.
- Kawas gateuw = Teu bisa liar lantaran kasakit, atawa geus rarempo, tapi ari awak lintuh.
- Kawas gula jeung peueut = Kacida dalitna, tara pasea, silih asih.
- Kawas hayam keur kumahkar = Teu daek cicing lantaran hate kaweur, atawa geus teu sabar ngadagoan nu diarep-arep.
- Kawas hayam panyambungan = Talamba-tolombo dina riungan lantaran euweuh nu wawuh.
- Kawas heulang pateuh jangjang = Meh teu bisa walakaya, lantaran teu boga nu bisa diandelkeun.
- Kawas himi-himi = Meh salilana babarengan duaan tara daek papisah.
- Kawas jeler kasaatan = Teu daek cicing, gawena ngan ka ditu ka dieu.
- Kawas jogjog mondok = Cekcok-recok, gandeng ku nu bareng ngaromong pabedas-bedas.
- Kawas ka budak rodek hulu = Ngahina, kawas ka jelema nu bodo atawa kawas ka budak nu bolon keneh.
- Kawas kacang ninggang kajang = Norostos capetang.
- Kawas kedok bakal = Rupa jelema anu goreng patut kacida.
- Kawas kedok rautaneun = Kacida goreng patutna kawas kedok nu can anggeus.
- Kawas kuda leupas ti gedogan = Ngumbar kahayang lantaran geus euweuh nu ngahalangan.
- Kawas kuuk = Dilarapkeun ka jelema nu sarena (ngedeng) morongkol.
- Kawas langit jeung bumi = Pohara bedana.
- Kawas lauk asup kana bubu = Teu bisa ngundurkeun diri deui, lantaran geus kabeungkeut ku jangji atawa sumpah.
- Kawas leungeun nu palid = Leungeun nu teu daek cicing, ngopepang, sagala dirampa, sagala dicabak.
- Kawas nanggeuy endog beubeureumna = Kacida didama-dama jeung dipusti-pustina awahing ku gede kanyaah (inggis nu dipikanyaahna tinemu balai).
- Kawas nu dipupul bayu = Taya tangan pangawasa.
- Kawas nu keked = Teu bisa barangbawa.
- Kawas nu mulangkeun panyiraman = Boga kahayang (pamenta) anu aneh cara nu keur nyiram, lantaran geus deukeut kana ajal.
- Kawas pantun teu jeung kacapi = Bisa mapatahan wungkul, teu bisa nyontoan.
- Kawas panyeupahan lalay = Lawon anu belel, kawas panyeupahan lalay.
- Kawas perah bedog rautaneun = Goreng patut.
- Kawas Rama jeung Sinta = Nurub cupu, nu kasep jeung nu geulis.
- Kawas siraru jadi = Jelema loba nu riab ka mana-mana.
- Kawas tatah = Teu hideng sorangan (digawe), kudu dititah (diparentah) bae.
- Kawas terong dibeulah dua = Dua jelema anu (meh) sarua rupana, biasana mah budak kembar.
- Kawas tikukur = Nyebut ngaran sorangan ka nu anyar pinanggih.
- Kawas toed = Budak beuki ngomong, celembeng.
- Kawas tunggul kahuru = Jelema goreng patut.
- Kawas ucing garong = Jelema jahat nu sok ngaranjah imah, sakapeung bari nandasa nu boga imah.
- Kawas ucing jeung anjing = Dua jelema anu teu daek akur, lamun paamprok kudu bae pasea.
- Kawas ucing kumareumbi = Jelema anu sok resep ruwal-rawel, siga ucing keur kumincir.
- Kawas ucing nyanding paisan = Deukeut kana pimaksiateun.
- Kejo asak, angeun datang = Sapagodos jeung maksud urang.
- Kelek jalan = Tempat anu teu gampang didatangan lantaran jauh ti jalan gede.
- Kebo mulih pakandangan = Balik ka lembur sorangan sabada lila ngumbara di lembur batur.
- Kembang buruan = Budak anu keur meujeuhna lucu sarta geus resep ulin di buruan.
- Kembang carita = Jadi bahan carita nu narik perhatian dina riungan- riungan.
- Kembang jalan Ungkluk.
- Kembang mata (soca) = Nu dipikanyaah atawa dipikaasih.
- Keuna ku aen = Meunang cocoba lantaran ku "panenjo" batur (loba teuing nu muji).
- Keuna ku lara teu keuna ku pati = Bisa jadi eleh atawa tatu, tapi moal maot.
- Keur bentang surem = Keur apes, keur goreng milik.
- Keur meujeuhna bilatung dulang = Keur meujeuhna parabaneun (barudak leutik), keur meujeuhna beuki dahar.
- Keur meujeuhna buta tulang buta daging = Keur meujeuhna bedas.
- Keur meujeuhna hejo lembok, rambay carita = Keur meujeuhna lubak-libuk, euweuh kakurang.
- Keuyeup apu = Jelema anu elehan jeung euweuh kahayang; kodomoyo, leuleumeuyeu.
- Kiceupna sabedug sakali = Jelema anu kacida lungguhna.
- Kiruh di girang, kiruh di hilir = Lamun nu di luhurna geus teu balener, tangtu nu di handapna oge sarua kitu.
- Kokod monongeun = Teu daekeun asak, lantaran mindeng dicabakan (bubuahan nu dipeuyeum).
- Kokolot begog = Ngomong teu merenah kawas kolot.
- Kokoro manggih mulud, puasa manggih lebaran = Makmak mekmek, kokomoan barangdahar atawa ngumpulkeun barang nepi ka poho kana kautamaan.
- Kokoro nyenang = Nembongkeun pangaboga nu teu sabaraha lantaran hayang dipuji (jalma miskin).
- Kokoro nyoso malarat rosa, lebaran teu meuncit hayam = Jelema anu kacida masakatna, sagala teu boga..
- Kolot dapuran = Pernah kolot nurutkeun pancakaki, sanajan umur leuwih ngora.
- Kolot dina beuheung munding = Kolot tapi teu loba kanyaho.
- Kolot kalapa = Dilarapkeun ka lalaki atawa awewe anu umurna geus kolot, tapi masih matak kataji.
- Kolot kolotok = Kolot tapi euweuh kanyaho, kosong tina elmu pangaweruh.
- Kolot pawongan (pawongeun) = Jelema anu umurna ngora keneh, tapi katembongna siga geus kolot.
- Koreh-koreh cok = Usaha buruh leutik, hasilna ngan cukup saharitaeun.
- Kotok bongkok kumorolong, kacingcalang kumarantang = Jelema anu pipilueun kana hiji urusan lantaran ukur kabawakeun ku batur, lain karepna sorangan.
- Kudu bisa ngeureut pakeun = Kudu bisa ngajeujeuhkeun rejeki, kudu sina mapahat.
- Kudu boga pikir rangkepan = Ulah ujug-ujug percaya kana omongan batur aim manis.
- Kudu ngukur ka kujur, nimbang ka awak = Sagala rupa tingkah laku kudu luyu jeung kaayaan diri sorangan.
- Kudu nyaho lautanana, kudu nyaho tatambanganana Kudu nganyahokeun adatna, kalakuanana, kangewana (karesepna).
- Kujang dua pangadekna = Usaha anu ngadatangkeun dua rupa kauntungan.
- Kukuh Ciburuy = Teu bisa diongget-ongget, teu daek nurut kana paham batur nu leuwih bener.
- Kukuk sumpung dilawanan dada leway = Sarua gorengna; nu ngambek dilawan ngambek, nu burung dilawan nu gelo.
- Kulak canggeum (bagja awak) = Milik hade atawa goreng geus ditangtukeun ku Gusti Nu Mahasuci.
- Kumaha bule hideungna (bae) = Kumaha engke bae buktina.
- Kumaha ceuk nu dibendo bae = Kumaha ceuk nu mingpin di luhur bae.
- Kumaha geletuk batuna kecebur caina/Kumaha kecebur caina, geletuk batuna bae = Kumaha behna, kumaha engke bae.
- Kumaha ramena pasar = Ula-ilu, kumaha guyubna batur (balarea).
- Kumambang kana kersa Pangersa = Pasrah kana takdir.
- Kumeok (ngeok) memeh dipacok = Wegah memeh ngajalankeun pagawean,
- Kumis bangbara ngaliang = Kumis nu nyeseg kana liang irung.
- Kurang jeujeuhan = Kurang ati-ati, kurang itungan.
- Kurang saeunan = Jelema nu teu patig jejeg pikiranana, rada gelo.
- Kuru aking ngajangjawing = Pohara kuruna.
- Kuru cileuh kentel peujit = Ngurangan sare, ngurangan dahar (tirakat), lantaran aya nu dimaksud.
- Kuru kurulang-kuriling = Lara sangsara kadungsang-dungsang.
- Kurung batok = Teu daek lunta ti lembur, jalma nu tara ka mana-mana, jadi teu loba kanyaho
Copyright © Tatar Pasundan
Posting Komentar